Samskipti
guttesen | 9. mars 2009 | Flokkað sem dægurþras
Sjónvarpsstofa. Par að horfa á sjónvarpið.
Hann: Heldurðu að Ryan sé bældur hommi?
Hún: Ég veit það ekki.
Stjórnarskrá Íslands
guttesen | 19. febrúar 2009 | Flokkað sem dægurþras
Ástæða er til að óttast að bakslag sé komið í áform stjórnarflokkanna um að efna til stjórnlagaþings um nýja stjórnarskrá.
Verði ekki boðað til stjórnlagaþings nú eru líkur til þess að tækifærið glatist og komi ekki á aftur fyrr en manngerðar hamfarir hafi á ný dunið á þjóðinni.
Undirskriftirnar verða afhentar fulltrúum stjórnvalda í byrjun mars næstkomandi, þá hefur alþingi enn tíma til að samþykja frumvarp um stjórnlagaþing. Við höfum þann tíma til að tryggja að stjórnlagaþing verði að veruleika.
Nú er tími aðgerða.
Hvað getum við gert?
- Safna fleiri undirskriftum.
Sendu póst á alla sem þú þekkir með hvatningu um að skrifa undir. - Hafðu samband við þingmenn og spurðu hvort þeir muni styðja eða beita sér fyrir lagasetningu um stjórnlagaþing.
Hér er listi yfir þingmenn, netföng og símanúmer. - Hengdu upp hvatningu á vinnustað, skóla eða annars staðar.
- Ef þig langar að taka þátt í baráttunni eða hefur hugmyndir hafðu þá samband.
Þorsti
guttesen | 13. febrúar 2009 | Flokkað sem dægurþras
Þegar ég horfi á Idol verð ég Coke-þyrstur …
Unglingurinn í riddarasögunni
guttesen | 6. febrúar 2009 | Flokkað sem dægurþras
Eftirfarandi tilvitnun er úr riddarasögu sem mér skilst að hafi verið skrifuð seint á 12. öld, og þýdd á íslensku á fyrri hluta 13. aldar:
Þá sá eg koma ríðanda riddara. Hann gerði mikið hark og háreysti af sér. Og sem eg leit hann einsaman, þá tók eg hest minn og vopn, og sé eg upp á hann. En hinn þegar sem reiður og illgjarn hleypti sem hann mátti skjótast. Og svo framt sem eg sá hann, þá heitaðist hann við mig og mælti: „Gaur,“ kvað hann, „mikla svívirðing hefir þú mér gert og skömm. Þú skyldir hafa stefnt mér til einvígis, ef þú hefðir sakir að gefa mér, ella biðja mig bæta, ef eg hefða við þig misgert, en þú gerðir mér ófrið. Vit fyrir víst, gaur, ef eg má, að þú skalt hljóta háðulega hlut þungra vandræða …“
- Úr „Ívents sögu Artúskappa“, Riddarasögur 2. bindi, Íslendingasagna-útgáfan, Haukadalsútgáfan, 1954, bls. 10-11.
Firringin bítur hinn firrta
guttesen | 26. janúar 2009 | Flokkað sem dægurþras
|
„Ég hef sjaldan heyrt aðra eins firru. Ef satt reynist þá er ekkert skrítið að skútan sé sokkin og staðreynd að hún verður þar, á hafsbotni.“
Skrifar Borgari Eyjunotandi í athugasemd þann 26. janúar, 2009 – kl. 10:41, við frétt þess efnis að útlit sé fyrir að minnihlutastjórn Samfylkingar og Vinstri grænna muni taka við fram að kosningum.
Sem sagt, ef satt reynist að minnihlutastjórn taki við, þá er ekkert skrítið að „skútan sé sokkin og staðreynd að hún verður þar, á hafsbotni.“ Það vill segja, það sem gerðist í fortíðinni (björgunar-aðgerðir ríkisstjórnar mistókust) skýrist af því sem nú blasir við (að skútan sokkin).
Þetta er athyglisverð söguskýring. Mér sýnist Borgari þessi vera að upplifa firringuna af fyrstu hendi eins og Georg Hegel útskýrði hana, hér haft eftir Bryan Magee í Sögu heimspekinnar: „[S]ú hugmynd að við það að koma á siðmenningu hafi maðurinn skapað alls konar stofnanir, reglur og hugmyndir sem hafi síðar meir farið að verða honum til trafala, þótt þær séu í raun hans eigin uppfinningar. Þær geta jafnvel verið honum algerlega framandi.“ (162)
Þá virðist mér sem að þeir hinir sömu sem vildu ekki „persónugera“ vandann (skútan sökk), hafi allatíð viljað persónugera lausnina (enginn annar mátti sinna björgunaraðgerðum). Þess vegna er sú hugmynd að einhverjir aðrir komi að lausninni þeim algerlega framandi.
Áskorun gegn þjóðarmorði
guttesen | 14. janúar 2009 | Flokkað sem dægurþras
Ég var í viðtali á Útvarpi Sögu í dag, þar sem ég meðal annars sagði frá eftirfarandi yfirlýsingu sem nokkur íslensk ljóðskáld hafa í hyggju að senda frá sér.
Yfirlýsing
Ljóðskáld á Íslandi fordæma fjöldamorð Ísraelsmanna á Gaza-svæðinu og hvetja íslensk stjórnvöld til að slíta stjórnmálasambandi við Ísrael.
Með afskiptaleysi sínu er ríkisstjórn Íslands í raun að samþykkja framferði Ísraelsmanna á hendur Palestínumönnum. Þögn er sama og samþykki.
Íslenska þjóðin getur ekki setið þögul hjá þegar mannréttindi eru brotin á jafn hrottafenginn hátt og nú ber við á Gaza. Ísland á að sýna ábyrgð á alþjóðlegum vettvangi, taka skýra afstöðu og fylgja þeirri afstöðu eftir. Það er með aðgerðaleysi alþjóðasamfélagsins, þar á meðal Íslands, sem morðin fá að viðgangast.
Við undirrituð líðum ekki að saklausir borgarar séu drepnir með þöglu samþykki stjórnvalda. Við krefjumst þess að yfirvöld láti nú þegar í sér heyra með afdráttarlausum hætti.
- – - – - – - – -
Undir þetta rita ýmis skáld. Verkefnið verður vonandi stærra í sniðum og flyst þá á nýjan stað með fleiri ljóðskáldum.
Ógeðslega fatlað
guttesen | 27. desember 2008 | Flokkað sem dægurþras
Tungumálið breytist. Eða öllu heldur, notkun þess breytist í meðför yngri kynslóðarinnar.
Engu að síður er hægt að nota einfalda rökhendingu til að læra hvað, að mati unga fólksins, er hægt að segja og hvernig beri að segja það.
Fyrst þurfum við að gefa okkur nokkrar grunnþýðingar.
Maðurinn = gaurinn
Ég vissi það [sagt með kaldhæðnum tón] = Ég vissi það ekki
Ég vissi það ekki [sagt með kaldhæðnum tón] = Ég vissi það
(Raunar er það svo að allt sem sagt er með kaldhæðnum tón þýðir andstæða þess)
Stórt / mikið / í stóru hlutfalli = ógeðslega
Ég tek það til baka = Djók (sagt með kaldhæðnum tón)
Það er maðkur í mysunni = Það er fatlað (sbr. hallærislegt, glatað)
Við Kjarvalsstaði = Út’á Rampi (Rampurinn er hjólabrettabraut á Mikla-túni / Klambratúni)
Nú skulum við gaumgæfa hvaða reglu við getum sett okkur við notkun þessara orðatiltækja:
Ef maðurinn við Kjarvalsstaði segist hafa sagt mér ósatt,
þá mun ég segja honum að ég hafi alla tíð vitað það og
að þetta hafi verið verulega hallærislegt af honum.
Hvernig hljóðar það svo í meðförum unga fólksins:
Ef gaurinn út’á rampi segist ver’að djók’í mér,
þá segist ég haf’ekki vitaða’ og að þetta hafi
verið ógeðslega fatlað af honum.
Ég fékk í skóinn
guttesen | 17. desember 2008 | Flokkað sem dægurþras
Síðan að jólasveinarnir hófu innreið sína í síðustu viku með gjafir handa góðum og þægum börnum hvern morgun hefur þeim ekki þótt ástæða til að gefa mér í skóinn. Krakkarnir bentu mér hins vegar á hvers vegna að svo væri, ég gleymdi einfaldlega alltaf að setja skóinn út í glugga. Sem er alveg rétt hjá þeim. En nú í morgun fékk ég sem sagt í skóinn: Tilvistarstefnan er mannhyggja eftir Sartre. Hvorki meira né minna.
Heimspekingar heimta réttlæti
guttesen | 15. nóvember 2008 | Flokkað sem dægurþras
|
Í dag kl 15, eins og undanfarna laugardaga, er efnt til mótmæla við Alþingishúsið við Austurvöll. Hér er ágætis lesning áður en haldið er niður í bæ:
Fjórtán íslenskir heimspekingar hafa sent frá sér yfirlýsingu til fjölmiðla, þar sem varað er við því að stjórnmálamenn teygi valdsvið sitt lengra en umboð þeirra leyfir. Auk þess gera heimspekingarnir kröfu um að sannleikurinn verði dreginn í dagsljósið og að ekki sé haldið hlífðarskildi yfir hinum ábyrgu. „Krafan um réttlæti er oft einnig krafa um makleg mála-gjöld þeirra sem brotið hafa af sér,“ segja þeir. |
|
| Enn hefur enginn verið látinn sæta ábyrgð á hruni Íslands. Á fjórða þúsund manns mótmælti á Austurvelli á laugardag og gert er ráð fyrir að mikill fjöldi komi þar saman [í dag]. Margir mótmælendanna krefjast þess að ríkisstjórnin og/eða stjórn Seðlabankans sæti ábyrgð. Geir H. Haarde forsætisráðherra og Ingibjörg Sólrún Gísladóttir utanríkisráðherra svöruðu því hins vegar á blaðamannafundi [í gær] að ekkert slíkt stæði til.
Geir var spurður að því á fyrri blaðamannafundi dagsins, sem haldinn var í Valhöll, hvort hann hyggðist segja af sér vegna hrunsins, en hann var forsætisráðherra og fjármálaráðherra í aðdraganda þess. Hann þvertók fyrir það. Heimspekingarniar vilja að réttlætið nái fram að ganga í krafti sannleikans. „Réttlætiskrafan lýtur fyrst og fremst að því að sannleikurinn verði leiddur í ljós, að engum verði hlíft við því að horfast í augu við mistök eða misgjörðir ef um slíkt er að ræða og að opinská umræða fari fram um þær ákvarðanir sem ýmist stuðluðu að hruninu eða dugðu ekki til að koma í veg fyrir það,“ segja þeir. Ekki er síður mikilvægt að tryggja stöndugt lýðræði hérlendis, en að koma fjármál ríkisins í rétt horf, segja heimspekingarnir að lokum. Hér er yfirlýsingin í heild sinni: Lýðræði og réttlæti „Þegar þrengir að, bæði efnahag og þjóðlífi, er lýðræðið og réttarríkið mikilvægasta sameign þjóðarinnar en um leið eign sem auðvelt er að skaða. Þessari sameign er nú stefnt í voða. Almenningur hefur orðið leiksoppur kringumstæðna sem hann ber enga ábyrgð á. Á tímum sem þessum er mikilvægt að rækta lýðræðislegar stofnanir samfélagsins, ekki síst Alþingi, og standa vörð um borgaraleg réttindi. Þetta er verkefni þingmanna, sem vinna í umboði kjósenda og mega ekki teygja valdsvið sitt lengra en það umboð leyfir. Þetta er verkefni ríkisstjórnar, sem verður að halda sig innan þeirra valdmarka sem Alþingi hefur markað henni og hafa í heiðri þá frumskyldu að vinna að almannaheill. Og þetta er verkefni allra íslenskra borgara, sem verða að nýta þau borgaralegu réttindi og rækja þær borgaralegu skyldur sem eru forsenda þess að Ísland geti verið öflugt lýðræðisríki. Hrun íslensku bankanna í byrjun október olli einstaklingum hér og erlendis miklu fjárhagslegu tjóni með ófyrirsjáanlegum afleiðingum fyrir allt samfélagið, menntun og menningu jafnt sem atvinnu- og athafnalíf. Hið himinhrópandi ranglæti sem er afleiðing af hruni fjármálakerfisins er það að almennir borgarar sitja uppi með reikninginn. Afar brýnt er að skorið verði úr um ábyrgð stjórnenda og eigenda bankanna annarsvegar, og stjórnvalda hinsvegar, á því sem gerðist. Réttlætiskrafan lýtur fyrst og fremst að því að sannleikurinn verði leiddur í ljós, að engum verði hlíft við því að horfast í augu við mistök eða misgjörðir ef um slíkt er að ræða og að opinská umræða fari fram um þær ákvarðanir sem ýmist stuðluðu að hruninu eða dugðu ekki til að koma í veg fyrir það. Krafan um réttlæti er oft einnig krafa um makleg málagjöld þeirra sem brotið hafa af sér. En í því hruni sem orðið hefur hér á landi er erfitt að sjá fyrir sér hverskonar málagjöld eru viðeigandi. Sú spurning er samofin spurningunni um það, hvernig við sem þjóð sjáum Ísland fyrir okkur sem réttarríki. Þegar brugðist er við vanda af þessu tagi sem leggur þungar byrðar á alla landsmenn er brýnt að dreifa þeim byrðum á sanngjarnan hátt. Mikilvægast er að tryggja öllum grundvallarforsendur þess að þeir geti tryggt sér og sínum farborða og gert áætlanir um líf sitt. Sérstaklega þarf að standa vörð um hagsmuni þeirra sem eiga á hættu að missa húsnæði, flosna upp úr námi eða missa lifibrauð sitt. Í þessu tilliti verður líka að huga vel að kjörum barna, bæði með því að styðja við bakið á barnafjölskyldum og treysta eftir megni þær stofnanir sem ásamt foreldrum bera ábyrgð á menntun og uppeldi barna. Hagur barna er mál þjóðarinnar allrar og prófsteinn á Ísland sem velferðarríki. Það er líka réttlætismál að ekki verði lagðar óhóflegar byrðar á þá hópa sem ekki eiga sér sterka málsvara, svo sem komandi kynslóðir og erlenda ríkisborgara sem hér búa. Jafnframt verður að koma í veg fyrir að auður safnist á fárra manna hendur eða að einstaklingar njóti forréttinda í krafti aðstöðu sinnar. Einnig er brýnt að við enduruppbyggingu íslensks samfélags verði þau gildi höfð að leiðarljósi sem taka mið af lífi og viðhorfum beggja kynja og margbreytileika íbúa landsins. Nú veltur allt á að viðbrögð við yfirstandandi kreppu verði til þess að efla lýðræði á Íslandi og festa réttarríkið í sessi. Það er ekki síður mikilvægt að byggja upp réttnefnt lýðræðissamfélag en að koma fjármálum ríkisins í eðlilegt horf.“ Ágúst Þór Árnason, Ástríður Stefánsdóttir, Björn Þorsteinsson, Eyja Margrét Brynjarsdóttir, Geir Sigurðsson, Giorgio Baruchello, Jón Ólafsson, Kristján Kristjánsson, Mikael M. Karlsson, Ólafur Páll Jónsson, Páll Skúlason, Sigríður Þorgeirsdóttir, Sigurður Kristinsson, Vilhjálmur Árnason. |
||
http://www.dv.is/frettir/2008/11/14/heimspekingar-heimta-rettlaeti/
Mynd: Dv.is. Sótt 15. nóvember 2008.
